五年前，位於黃大仙竹園邨的浸信會天虹小學，原是一間只得6班、瀕臨「被殺」的學校，但經校長朱子穎近年積極推行STEM(科學、技術、工程及數學)教育與快樂學習，這間屋邨小學成功轉型，吸引每年超過千名家長慕名而來為子女報讀。

教育的初心

校長朱子穎是個「八十後」，從教育學院(現為教育大學)畢業後，在多間小學擔任老師約十年，主要任教英文科，有時亦兼教數學與常識科。十年的教學生涯，令他漸漸發現，教育界的生態，與自己心中的教育抱負根本是背道而馳：「明明教育應該係快樂嘅，教育應該係體驗嘅，但唔知點解，當一個新老師入咗學校做嘢，就會執行一啲自己都唔相信嘅教學方法。」

「『小朋友，聽日考試喇喎，不如你畀心機啲讀書啦，校長就會好開心』，你試諗吓呢句說話有幾可怕？首先，你同我都超唔鍾意、有負面嘅情感，對於要考試，但係你好正面咁鼓勵小朋友做好啲。」於是，他決心要扭轉這種為考生而鼓勵操練的教學模式。

用創意科技來改革

五年前，在機緣巧合下朱子穎得悉瀕臨「殺校」的天虹小學正在招聘校長，便決心放膽一試：「成日都話創意科技可以改變好多嘢，係咪可以喺呢度實踐？如果呢個概念係正確嘅，咁喺最唔可能嘅地方，就可以發揮佢嘅光芒喇！」

回憶起第一天上班，朱校長仍覺得十分有趣：「五年前我第一日返工時，其實我係全校年紀最細，啲老師都大過我，有啲老師出嚟教書我都未出世。」除了要帶領一班年紀比自己大的老師，他最深刻的是破舊的校舍：「最記得嘅係，我第一日返工，呢間學校畀我嘅感覺係一間鬼屋，甚至試過借出校舍畀人哋拍電影。好感恩，五年後再有人借場拍電影，但今次係講夢想。」

五年下來，他不但在校內推行「電子書包」計劃，小朋友只需要帶電腦而不用帶書本上學，亦有推動3D打印和程式編碼等，校園亦有一個「Lego室」，放滿大大小小的Lego，讓學生小息及課餘時間，盡情發揮創意，用Lego砌出心中的圖畫，大力推動STEM教育。

學生自選學習

此外，他又於去年展開「Dream Starter」計劃，讓學生上午留在課室上課，下午就由他們自行決定學習甚麼，由老師找來社會上不同界別的人，教授小朋友想學的課程：「其實『課程』呢兩個字，只係解『學習機會的提供』。我哋所謂設計課程嘅人，就應該思考點樣用我哋嘅方法，為小朋友提供更多學習機會。最好嘅方法就係開放我哋嘅課室，同更多業界同學校以外嘅人合作。小朋友有更多學習機會嘅話，我哋嘅課程就會愈來愈寬闊。」

由瀕臨「殺校」到「快樂學校」

經過朱校長一番努力和一眾老師的配合，天虹小學成功轉型成名副其實的「快樂學校」，每年吸引逾千名家長慕名而來，學校亦從五年前的6班增至20班，教師亦由當初的14人增至現今的47人。對此，他特別感激願意改革的教師團隊：「佢哋能夠放低一啲過去成功過嘅教學方法，放低自己做咗廿幾三十年嘅方法，嘗試用另一種方法嚟教育，我好感謝佢哋嘅信任。」

離開為了更大的願景

朱校長任內為天虹小學帶來不少改變，但他決定於本學年完結後就離任，轉到一間貴價私校任總校長，屆時會着手開發一個名為EdMetro的教育程式，提供予本地和外國的學校使用，希望藉此改變整個教育界的大氣候。

離任在即，朱校長最捨不得的是多年來和老師、家長、學生之間建立的信任，在最後的一段時間，他會把五年來在天虹的教學經驗，寫成書和拍成微電影，與教育界分享。

今集《港。故》用7分半鐘，細說了朱校長如何將「鬼屋」般的校舍，改造成小朋友的「快樂學校」，實現了他的「教育夢」。

-------------
《港。故》：東網每周專題習作，講故事、講香港人的故事，請關注《港。故》fb：https://bit.ly/oncckonggufb